Dasturiy injiniring

Al-Xorazmiy universitetining Dasturiy ta’minot muhandisligi bakalavriat dasturi zamonaviy bilim va amaliy ko‘nikmalarga ega, kelajak talablariga mos dasturiy ta’minot muhandislarini tayyorlashga qaratilgan.

Dastur xalqaro ta’lim standartlari asosida ishlab chiqilgan bo‘lib, O‘zbekistonning jadal rivojlanayotgan raqamli iqtisodiyoti ehtiyojlariga moslashtirilgan. U hisoblash texnologiyalari, axborot tizimlari va avtomatlashtirish yo‘nalishlarini birlashtirib, nazariy bilimlar hamda amaliy tajriba o‘rtasida muvozanatni ta’minlaydi.

Nimalarni o‘rganasiz?

Talabalar quyidagi yo‘nalishlarda mustahkam bilim va ko‘nikmalarga ega bo‘ladilar:

• Algoritmlar, hisoblash nazariyasi va axborot nazariyasi — zamonaviy intellektual tizimlarning asosi;
• Dasturlash tillari va dasturlash paradigmalarini qo‘llash;
• Ma’lumotlar bazalarini yaratish va boshqarish tizimlari;
• Kompyuter arxitekturasi va apparat ta’minoti asoslari;
• Operatsion tizimlar, kompyuter tarmoqlari va o‘rnatilgan tizimlar (embedded systems);
• Kiberxavfsizlik va kriptografiya.

Dasturda Sun’iy intellekt (AI) va Mashinali o‘qitish (Machine Learning) texnologiyalariga alohida e’tibor qaratiladi. Talabalar ushbu texnologiyalarni quyidagi yo‘nalishlarda qo‘llashni o‘rganadilar:

• Kompyuter ko‘rish (Computer Vision) — kompyuterlarga vizual ma’lumotlarni tahlil qilish va tushunish imkonini beruvchi texnologiyalar;
• Tabiiy tilni qayta ishlash (Natural Language Processing – NLP) — kompyuterlarning inson tilini tushunishi va yaratishini ta’minlovchi usullar.

Ta’lim jarayoni ma’ruzalar, amaliy mashg‘ulotlar, laboratoriya ishlari, shaxsiy rivojlanish darslari, real loyihalar va keys-stadilar hamda mustaqil ta’lim shakllari orqali amalga oshiriladi.

Talabalar har o‘quv yilida 60 ECTS kredit o‘zlashtiradilar. O‘quv dasturi talaba, ish beruvchi va boshqa manfaatdor tomonlardan olingan fikr-mulohazalar asosida takomillashtirib borilishi mumkin.

Qabul talablari

Nomzodlar quyidagi talablarga javob berishlari kerak:

1. O‘rta maktab, akademik litsey yoki kollej diplomi yoxud undan yuqori darajadagi ta’lim hujjatiga ega bo‘lish;
2. Ingliz tilini bilish darajasini tasdiqlovchi hujjat:
   • TOEFL iBT — kamida 46 ball;
   • IELTS — kamida 5.5 ball;
   • CEFR — kamida B2 daraja.

Eslatma: Universitet faqat rasmiy test markazlarida topshirilgan TOEFL iBT natijalarini qabul qiladi. TOEFL iBT Home Edition natijalari qabul qilinmaydi.