Davolash ishi

1. Umumiy tavsifi.

60910200 — Davolash ishi ta'lim yo'nalishi bo'yicha bakalavrlar tayyorlash kunduzgi ta'lim shaklida amalga oshiriladi. Kunduzgi ta'limda bakalavriat dasturining me'yoriy muddati 6 yil.

1.1. Qo'llanish sohasi.

1.1.1. Malaka talabining qo'llanishi.

Malaka talabi 60910200 — Davolash ishi ta'lim yo'nalishi bo'yicha bakalavr tayyorlovchi barcha tibbiyot oliy ta'lim muassasalari uchun talablar majmuyini ifodalaydi.

1.1.2. Malaka talablarining asosiy foydalanuvchilari:

Mazkur ta'lim yo'nalishi bo'yicha malaka talablari, o'quv reja va o'quv dasturlarini ishlab chiqish va yangilash, ular asosida o'quv jarayonini samarali amalga oshirish uchun mas'ul hamda o'z vakolat doirasida bitiruvchilarning tayyorgarlik darajasiga javob beradigan oliy ta'lim muassasalarining boshqaruv xodimlari (rektor, prorektorlar, o'quv bo'limi boshlig'i, dekanlar va kafedra mudirlari) va professor-o'qituvchilari;

ta'lim yo'nalishining o'quv rejasi va o'quv dasturlarini o'zlashtiruvchi oliy ta'lim muassasasining talabalari;

bakalavriat bitiruvchilarining tayyorgarlik darajasini baholashni amalga oshiruvchi davlat attestatsiya komissiyalari;

ta'limni boshqarish bo'yicha vakolatli davlat organlari;

oliy ta'lim muassasalarini moliyalashtirishni ta'minlovchi organlar;

oliy ta'lim tizimini akkreditatsiya va sifatini nazorat qiluvchi vakolatli davlat organlari;

kadrlar buyurtmachilari va ish beruvchi tashkilot va korxonalar;

oliy ta'lim muassasalariga o'qishga kirayotgan abituriyentlar, ularning ota-onalari va boshqa manfaatdor shaxslar.

1.2. Kasbiy faoliyatlarining tavsifi.

1.2.1. Kasbiy faoliyatining sohalari:

sog'liqni saqlash tizimi muassasalarida, aholi o'rtasida sog'lom turmush tarzini targ'ibot qilish, o'tkir va surunkali kasalliklarning kelib chiqishi va tarqalishining oldini olish, yuqumli kasalliklarning oldini olish doirasida epidemiya va pandemiyaga qarshi chora-tadbirlarni ishlab chiqish va amalga oshirish, kasalliklarni tashxislash va davolashning zamonaviy usullari, milliy protokollardan hamda dalillarga asoslangan tibbiyotdan keng foydalangan holda bemorlarning tibbiy muammolari bo'yicha asosiy vazifalarni hal qilish, raqamli texnologiyalardan, jumladan, elektron tibbiy qaydlar va teletibbiyotdan samarali foydalanish, sog'liqni saqlash tizimining birlamchi bo'g'inida tibbiy-ijtimoiy vazifalarni bajarish bo'yicha kompleks masalalarni yechishni o'z ichiga oladi.

1.2.2. Kasbiy faoliyatlarining obyektlari:

Sog'liqni saqlashning birlamchi tibbiy-sanitariya yordami muassasalari (oilaviy poliklinikalar va ularning filiallari, oilaviy shifokor punktlari).

1.2.3. Kasbiy faoliyatlarining turlari:

• tibbiy-profilaktik;
• tashxislash va davolash;
• tashkiliy-boshqaruv;
• axborot-tahliliy;
• ilmiy-tadqiqot

1.2.4. Kasbiy vazifalari:

60910200 – Davolash ishi ta'lim yo'nalishi bo'yicha Milliy malaka ramkasining 6-malaka darajasi hamda bakalavr kasbiy faoliyatlarining sohalari, obyektlari va turlariga muvofiq, bakalavriat bitiruvchisi quyidagi kasbiy vazifalarni samarali bajarishga qodir bo'lishi lozim:

Tibbiy-profilaktik faoliyatda:

sog'lomlashtirish, sanitar-gigiyenik va profilaktik chora-tadbirlar kompleksini mustaqil tarzda ishlab chiqish, muvofiqlashtirish va o'tkazish;

aholi va bemorlar orasida sog'lom turmush tarzi ko'nikmalarini shakllantirish, ularning jismoniy, tibbiy faolligini oshirish;

tibbiy-profilaktika yo'nalishida qo'llanilayotgan ilg'or profilaktik tadbirlarni o'rganish va amaliyotga tatbiq etish;

tibbiy-profilaktika yo'nalishida profilaktik chora-tadbirlarni tashkillashtirish bo'yicha to'liq hajmdagi zaruriy ko'nikmalarga ega bo'lgan yuqori malakali mutaxassis sifatida mustaqil amaliy faoliyatni amalga oshirishni egallash va baholash qobiliyatlariga ega bo'lishi lozim.

Tashxislash va davolash faoliyatida:

qabulda va uyda bemorni qabul qilish, anamnez va klinik tekshiruvdan olingan ma'lumotlarni sharhlash, dastlabki hamda differentsial tashxis qo'yish va ob'ektiv tekshiruv natijalaridan foydalangan holda bemor kasalligini boshqarish rejasini ishlab chiqish;

oilaviy poliklinikada mavjud imkoniyat va sharoitlardan kelib chiqib Davlat byudjeti mablag'lari hisobidan qoplanadigan tibbiy yordamning kafolatlangan hajmlari ro'yxatiga muvofiq bolalar va kattalarda o'tkir va surunkali kasalliklarni oldini olish, tashxislash va davolash;

hayotga xavf solgan holatlarda shifoxonagacha birlamchi tibbiy yordam ko'rsatish;

bemorlarda kasallikning xavf omillarini baholash, sog'lig'ini muhofaza qilish va mustahkamlash, sog'lom turmush tarzini jismoniy va ruhiy jihatdan saqlash bo'yicha maslahatlar berish, ratsional va sog'lom ovqatlanish, oilani rejalashtirish, homilador ayollarga oiv-infektsiyasi hususida, shuningdek homilador, fertil yoshdagi, tuqqan ayollarga chaqaloqni ko'krak suti bilan boqish, oilani rejalashtirish hamda reproduktiv salomatlik masalalari bo'yicha maslahatlar berish;

bemorlarni shifoxonaga yotqizilgungacha shifokorlik yordamini ko'rsatish, tor soha mutaxassisini chaqirish yoki bemorlarga tegishli davolash-profilaktika muassasasiga yo'llanma berish;

istalmagan homiladorlikni oldini olish, homilador ayolning antenatal nazorati, tuqqan ayollarda tug'ruqdan keyingi ko'riklarini amalga oshirish;

klinik protokollarga muvofiq skrining tekshiruvlari va taqvimga asosan emlashni tavsiya etish, profilaktik tadbirlarni nazorat qilish;

cheklov choralarini (tibbiy raddiya) joriy etish uchun tibbiy ko'rsatmalarni aniqlash;

yuqumli kasallik, oziq-ovqatdan, o'tkir kasb (professional) zaharlanishi aniqlanganda favqulodda xabarnomani shakllantirish;

tor soha mutaxassislari va boshqa professional guruhlar (ijtimoiy xodim, psixolog va boshqalar), hamshiralarga surunkali yuqumli bo'lmagan kasalliklarga chalingan bemorlarga uzoq muddatli tibbiy yordam ko'rsatishda qatnashish;

surunkali kasalliklar bilan nazoratda turgan bemorlarni doimiy yoki vaqtinchalik yashash joyida va (yoki) muassasada kuzatish va uchlamchi profilaktika tadbirlarini o'tkazish;

shoshilinch va o'tkir holatda murojaat qilgan bemorlarga va biriktirilgan aholiga shifoxonagacha bo'lgan shoshilinch tibbiy yordami ko'rsatish, tez tibbiy yordamga xabar berish va (yoki) tez tibbiy yordam mashinasida kuzatib borish;

aholiga (bemorlarga) tibbiy reabilitatsiya muolajalarini tayinlash (fizioterapiya muolajalari, davolovchi jismoniy mashqlar va boshqalar);

aholiga (bemorlarga) klinik protokollarga muvofiq kunduzgi statsionarda davolanish uchun davo muolajalarini tayinlash, nazorat qilish hamda kunduzgi shifoxona tibbiy hujjatlarini yuritish;

surunkali, davolab bo'lmaydigan, progressiv kasalliklarga chalingan bemorlarga palliativ tibbiy yordam ko'rsatish;

mustaqil harakatlana olmaydigan, aqli zaif yoki jismoniy imkoniyati cheklangan (nogiron) aholiga (bemorga) doimiy yoki vaqtinchalik yashash joyida tibbiy yordam ko'rsatish, yuqumli kasalliklar o'choqlarida observatsiya tadbirlarini o'tkazish;

o'rnatilgan tartibda vaqtincha mehnatga layoqatsizlik ekspertizasini o'tkazish va mehnatga layoqatsizlik turg'un holatlarida nogironlikni belgilash uchun tibbiy ijtimoiy ekspertiza komissiyasiga o'z vaqtida yo'llash;

faoliyatidagi barcha jarayonlarni "Elektron sog'liqni saqlash" axborot tizimida o'z vaqtida va to'g'ri qayd etilishini ta'minlash;

sog'lomlashtirish tadbirlari bo'yicha dasturlar ishlab chiqish;

aholini (bemorni) laboratoriya va instrumental tekshiruvlarga yuborish;

tibbiy hujjatlar bilan ishlash va o'z faoliyati bo'yicha hisobotlarni shakllantirish hamda taqdim qilish;

davolashning tibbiy va tibbiy bo'lmagan usullardan foydalanish samaradorligi va xavfsizligini baholash;

kasbiy faoliyatiga yo'naltirilgan malakasini doimiy ravishda oshirib borish;

yangi bilim va usullarni ishlab chiqish, tarqatish va joriy etishga ko'maklashish;

maxsus tibbiy axborot va uning manbalarini tanqidiy baholash va qaror qabul qilishda ulardan foydalanish;

barcha tashxislash va davo muolajalarini o'tkazishda bemorlarning xavfsizligini kafolatlash, samaradorlik, maqsadga muvofiqlik va tejamkorlik tamoyillarini qo'llash;

tibbiyot brigadasi faoliyatini tashkillashtirish va boshqarish;

tibbiyot brigadasi faoliyatini tashkil qilish, tahlil etish, aholi salomatlik holatini baholash, biriktirilgan hududning "Salomatlik profili"ni tuzish va uni ijobiy o'zgarishiga erishishda jamoat tashkilotlari va hamkorlarni jalb etish;

tibbiyot brigadasi a'zolari faoliyati samaradorligini yaxshilash, faoliyatida ijobiy natijalarga erishgan tibbiyot xodimlarini rag'batlantirish bo'yicha tegishli birlamchi tibbiy-sanitariya yordami muassasasi rahbariga takliflar kiritish;

hamkor tashkilotlar bilan birgalikda aholi orasida sog'lom turmush tarzini shakllantirish, jismoniy faollikni qo'llab-quvvatlash bo'yicha ommaviy targ'ibot tadbirlarini o'tkazish va qatnashish, "Salomatlik maktabi" faoliyatini amalga oshirish;

biriktirilgan aholi yashaydigan hududda sanitariya va epidemiyaga qarshi keng qamrovli tadbirlarni tashkil etish, aniqlangan yuqumli kasalliklar, zaharlanish, jarohatlanish va favqulodda holatlar to'g'risida o'z vaqtida xabarnoma berish;

"Onalar maktabi" faoliyatini olib borish, bunda yosh onalarni bolalarni ko'krak suti bilan boqish va oziqlantirish, to'g'ri parvarish qilish, o'sish va rivojlanishini nazorat qilish, chiniqtirish va kasallanishini oldini olishga o'rgatish;

ayollar va bolalarni ratsional ovqatlantirish, ota-onalar va bolalar o'rtasida bog'liqlikni rivojlantirish, oilada bola uchun xavfsiz muhit yaratish, jarohatlar va baxtsiz hodisalarning oldini olish, bolalarda motorika va nutqni rivojlantirishda kechikish va boshqalar bo'yicha bolaning ota-onasi va parvarishlovchisiga tavsiyalar berish;

yuqumli bo'lmagan kasalliklar profilaktikasi maqsadida aholi orasida sog'lom turmush tarzini shakllantirish, aholining shaxsiy gigiena qoidalariga rioya qilish, kun tartibini to'g'ri tashkillashtirish, to'g'ri ovqatlanish va jismoniy faollikni ta'minlash, kasalliklar profilaktikasi sohasida bilim va ko'nikmalarini hosil qilish;

aholiga birlamchi tibbiy-sanitariya yordami ko'rsatishda bemor huquqining poymol bo'lmasligini ta'minlash, shifokor sirini saqlanishiga erishish, hamkasblariga samimiy munosabatda bo'lish;

oilaviy poliklinika hududida bemorlarga hayotni saqlab qolish yoki jiddiy asoratlarni oldini olish uchun darhol tibbiy aralashuvni talab qiladigan holatlarda (bemor oilaviy poliklinika hududida bo'lganda yoki bemor uchinchi shaxslar tomonidan olib kelinganda) tez tibbiy yordam brigadasi kelguniga qadar shoshilinch tibbiy yordam ko'rsatish.

Tashkiliy-boshqaruv faoliyatida:

sog'liqni saqlashda birlamchi bo'g'in ishini tashkil qilish va uni boshqarish;

tibbiy brigadani boshqarish;

bajarayotgan faoliyati bo'yicha ish rejasini tuzish va uni bajarish, nazorat qilish va amalga oshirilgan ishlari natijalarini baholash;

kasbga oid muammolar yechimlarini amaliyotga tatbiq etish, kasbiy faoliyati jarayonida sifatni boshqarish.

Axborot-tahliliy faoliyatida:

Demografik ko'rsatkichlarni tahlil qilish va hisobot tayyorlash;

Aholi o'rtasida yuqumli va yuqumli bo'lmagan kasalliklarni uchrashi bo'yicha ma'lumotlarni tahlil qilish va hisobot tayyorlash;

Rejali va tezkor emlash natijalari bo'yicha ma'lumot tayyorlash va taqdim etish.

Ilmiy-tadqiqot faoliyatida:

Ilmiy-tadqiqot ishlarini olib borish;

Ilmiy-amaliy seminarlar va konferentsiyalarda ishtirok etish;

Ilmiy-tahliliy ommabop nashrlarda maqolalar bilan qatnashish;

Mavzu bo'yicha ilmiy ma'lumotlarni yig'ish va tahlil qilish;

ilmiy-tadqiqot ishlanmalarini tayyorlash.

2. Kasbiy kompetensiyalariga qo'yiladigan talablar

2.1. Kasbiy kompetentsiyalar ro'yxati quyidagi kompetentsiya toifalari asosida shakllantriladi:

Tibbiy bilimlar;
Amaliy ko'nikmalar va klinik fikrlash;
Shaxslararo muloqot va kommunikatsiya;
Etika va empatiya;
Oilaviy shifokorning shaxsiy rivojlanishi;
Uzluksiz kasbiy rivojlanish;
Jamoat salomatligini saqlash.

2.2. Kasbiy kompetentsiyalarni egallashni ta'minlaydigan fanlar va amaliyotlarga qo'yiladigan talablar:

Talabalarni kasbiy kompetentsiyalar, bilim va ko'nikmalarni egallashi mantiqiy ketma-ketlikda kiritiladigan majburiy va tanlov fanlarni o'zlashtirish, amaliyotlarni o'tish hamda boshqa o'quv mashg'ulot va akademik vazifalarni bajarish yordamida amalga oshiriladi;

Davolash ishi ta'lim yo'nalishi bo'yicha o'quv rejasidagi majburiy fanlar blokiga bevosita kasbiy kompetentsiyalarni egallashga qaratilgan zarur tayanch bilim va ko'nikmalarni ta'minlaydigan fanlar;

tanlov fanlari blokiga ta'lim yo'nalishi doirasida mutaxassislikdan kelib chiqib, chuqurlashtirilgan qo'shimcha bilim berish, bevosita ixtisosligi uchun zarur kompetentsiyalarni kengaytirishga xizmat qiladigan, shuningdek talabalaning shaxsiy qiziqishlari, ijodiy yondoshuvlari va iqtidorini qo'llab-quvvatlashga qaratilgan fanlar kiritiladi.

Ta'lim yo'nalishi bo'yicha quyidagi amaliyotlar o'tkaziladi:

o'quv tanishuv amaliyoti.

ishlab chiqarish amaliyoti.

bitiruv oldi amaliyoti.