Navoiy davlat konchilik va texnologiyalar universiteti

Navoiy davlat konchilik va texnologiyalar universiteti (NDKTU) yarim asrdan ortiq tarixga ega.

NDKTU tog'-kon sanoati uchun, shuningdek, mashinasozlik, elektroenergetika, energetika, kimyo texnologiyasi, jarayonlarni avtomatlashtirish va boshqalar kabi tegishli tarmoqlar uchun yuqori malakali kadrlarni tayyorlaydi. Universitet professor-o‘qituvchilarining fidoyiligi, ishlab chiqarish bilan yaqindan integratsiyasi, xorijiy hamkorlar bilan samarali hamkorligi bilan ta’lim muassasalari orasida alohida ajralib turadi. NDKTU ilmiy konferensiyalarni tashkil qiladi va faol qo‘llab-quvvatlaydi va bu orqali bilim va tajriba almashish uchun platforma yaratadi, ilmiy tadqiqotlarni muvofiqlash hamda talabalar va professor-o'qituvchilarga dolzarb munozaralar va loyihalarda qatnashish imkoniyatini beradi. Shuningdek, universitet tog'-kon ta'limi sohasida eng ilg‘or OTMlar bilan talabalar almashinuv dasturiga ega. Navoiy konchilik va texnologiyalar universitetining oltin va uran qazib olish sohalaridagi tajribasi bizning o‘quv dasturimizga ajoyib mavqe beradi.

Universitet tarixi

• 1963 –Toshkent politexnika instituti filiali
• 1990 – Buxoro oziq-ovqat va yengil sanoat texnologiya instituti filiali
• 1992 – Toshkent davlat texnika universiteti filiali
• 1995 – Navoiy davlat konchilik instituti

O‘zbekiston Respublikasi Prezidentining 2022-yil 31-martdagi “Navoiy davlat konchilik va texnologiyalar universitetini tashkil etish to‘g‘risida”gi  PQ-186-son qarori bilan Navoiy davlat konchilik instituti Navoiy davlat konchilik va texnologiyalar universiteti etib qayta tashkil etildi.

Navoiy davlat konchilik va texnologiyalar universiteti xorijiy talabalar uchun sifatli ta’lim olish va o‘qish davrida qulay sharoitlarda yashash imkoniyatlarini yaratadi. Universitet konchilik, metallurgiya, energetika, mashinasozlik, foydali qazilmalarni qazib olish va qayta ishlash texnologiyalari hamda boshqa zamonaviy texnik va muhandislik yo‘nalishlari bo‘yicha mutaxassislar tayyorlaydi. Ta’lim jarayoni talabalarga nafaqat nazariy bilimlar, balki zamonaviy uskunalar, ilmiy faoliyat va sanoat korxonalari bilan hamkorlik orqali amaliy ko‘nikmalarni egallash imkonini beradi.

Xorijiy fuqarolar universitetga o‘qishga kirish uchun zarur hujjatlarni taqdim etishlari mumkin. Buning uchun ariza, pasport, ta’lim to‘g‘risidagi hujjat (ilovasi bilan), zarur bo‘lganda hujjatlarning tarjimasi, fotosuratlar va tibbiy ma’lumotnomalar talab qilinadi. Xorijiy talabalarni qabul qilish universitetning tegishli bo‘limlari orqali amalga oshiriladi va ular hujjatlarni rasmiylashtirish hamda o‘qish jarayoni bilan bog‘liq tashkiliy masalalarda yordam ko‘rsatadi. Xorijiy talabalar ta’limni asosan kontrakt asosida oladilar, o‘qish narxi esa tanlangan mutaxassislik va ta’lim bosqichiga bog‘liq bo‘ladi.

Universitetda ta’lim tillari o‘zbek, rus va ingliz tillaridan iborat bo‘lib, bu turli mamlakatlardan kelgan xorijiy talabalar uchun qulay ta’lim muhitini yaratadi. Bir nechta tillardan foydalanish talabalar uchun o‘quv jarayoniga moslashishni osonlashtiradi va qulay til muhitida bilim olish imkonini beradi. Zarur hollarda talabalarga qo‘shimcha til tayyorgarligi imkoniyatlari ham yaratilishi mumkin.

Talabalar uchun bo‘sh joylar mavjud bo‘lsa, universitet yotoqxonasida yashash imkoniyati taqdim etiladi. Yotoqxonalarda talabalar uchun qulay yashash sharoitlari yaratilgan bo‘lib, xonalar, umumiy foydalanish joylari va zarur qulayliklar mavjud. Xorijiy talabalar migratsiya talablari, ro‘yxatdan o‘tish va kerakli hujjatlarni rasmiylashtirish masalalarida ham qo‘llab-quvvatlanadi. Universitetda xorijiy talabalar bilan ishlash bo‘limi faoliyat yuritadi va ushbu bo‘lim migratsiya hujjatlari hamda boshqa tashkiliy masalalar bo‘yicha yordam ko‘rsatadi.

Talabalarning bo‘sh vaqtini mazmunli tashkil etish maqsadida universitetda sport, o‘quv va ilmiy to‘garaklar, shuningdek turli talabalar klublari faoliyat yuritadi. Talabalar turli tadbirlarda ishtirok etishlari, o‘z qiziqishlarini rivojlantirishlari, ijodiy qobiliyatlarini oshirishlari va o‘quv dasturidan tashqari qo‘shimcha tajribaga ega bo‘lishlari mumkin.

Faol turmush tarzini qo‘llab-quvvatlash uchun universitetda zarur jihozlar bilan ta’minlangan sport majmuasi mavjud. Bu yerda talabalar jismoniy tarbiya bilan shug‘ullanishlari, sport to‘garaklarida qatnashishlari va turli musobaqalarda ishtirok etishlari mumkin. Ta’lim va ilmiy tadqiqot faoliyati uchun universitet zamonaviy laboratoriyalar va kompyuter xonalari bilan ta’minlangan bo‘lib, ular amaliy mashg‘ulotlarni bajarish, ilmiy izlanishlar olib borish va kasbiy ko‘nikmalarni rivojlantirish imkonini beradi.

Universitet hududining barcha joylarida bepul internetdan foydalanish imkoniyati mavjud. Bu talabalar uchun o‘qish, mustaqil tayyorgarlik ko‘rish va ilmiy faoliyat olib borishda qulay sharoit yaratadi. Talabalar elektron resurslardan, zamonaviy texnologiyalardan va raqamli materiallardan foydalanib, topshiriqlar va loyihalarni tayyorlashlari mumkin.

Universitet talabalar uchun maslahat va psixologik yordam xizmatlarini ham taqdim etadi. Mutaxassislar talabalarga yangi ta’lim va ijtimoiy muhitga moslashishda, yuzaga keladigan masalalarni hal qilishda hamda o‘qish davrida zarur yordam olishda ko‘maklashadi.

Universitetning bakalavriat va magistratura ta’lim dasturlari bosqichma-bosqich xalqaro akkreditatsiyadan o‘tkazilmoqda. Bu ta’lim sifatini tasdiqlaydi va olingan diplomning xalqaro miqyosda tan olinishiga yordam beradi. Bu esa bitiruvchilarga nafaqat O‘zbekistonda, balki xorijiy mamlakatlarda ham ish topish va professional faoliyatini rivojlantirish uchun keng imkoniyatlar yaratadi. Navoiy davlat konchilik va texnologiyalar universitetida tahsil olish xorijiy talabalar uchun zamonaviy bilim olish, kasbiy rivojlanish va o‘qish davrida qulay sharoitlarda yashash imkonini beradi.

Xalqaro hamkorlik zamonaviy universitet hayotining ajralmas qismidir. Ta'lim sohasi samarali va uyg‘un rivojlanish uchun u jahon ta'lim va ilmiy hamjamiyati tomonidan shakllantirilgan ustuvorliklarni hisobga olishi, ilmiy yutuqlarga tayanishi lozim. Universitetning xalqaro rivojlanish strategiyasini muvaffaqiyatli amalga oshirilishi uning dunyodagi nufuzini ko‘tarilishini, xalqaro reytingda munosib o‘rin egallashi garoviga aylangan. Bu bilan birga xalqaro aloqalarni kengaytirilishi qo‘shimcha moliyalashtirish va ta’lim xizmatlari bozorida raqobatbardoshlik manbai hisoblanadi.

Bugungi kunda dunyodagi globallashuv va integratsiya jarayonlarining jadallashish sur’atlarni inobatga olgan holda 2019-yil 8-oktabrdagi O‘zbekiston Respublikasi Prezidentining «O‘zbekiston Respublikasi oliy taʼlim tizimini 2030 yilgacha rivojlantirish kontseptsiyasini tasdiqlash to‘g‘risida»gi PF-5847-son Farmoni ta’lim sifatini yaxshilash, raqobatbardosh kadrlar tayyorlash, ilmiy va innovatsion faoliyatni samarali tashkil etish, xalqaro hamkorlikni rivojlantirish uchun alohida ahamiyat kasb etadi. Ushbu farmondagi vazifalarni izchil bajarishda hamda O‘zbekiston Respublikasi Prezidentining 2022-yil 31-martdagi “Navoiy davlat konchilik va texnologiyalar universitetini tashkil etish to‘g‘risida”gi PQ-186-son qarorida belgilangan maqsadli ko‘rsatkichlarga erishishda universitetning Xalqaro hamkorlik bo‘limining o‘rni yanada oshmoqda.

Universitetning xalqaro faoliyati quyidagi yo‘nalishlarda amalga oshiriladi:

• O‘quv jarayoniga nufuzli oliy ta’lim muassasalaridan xorijiy professor-o‘qituvchilarni jalb etish;
• Universitetda xorijiy talabalar ulushini oshirish;
• Xorijiy oliy ta’lim muassasalari bilan akademik almashuv dasturlari asosida o‘quv jarayonini tashkil qilish va undagi talabalar eshtirokini ta’minlash;
• Xalqaro loyihalar asosida xorijiy investitsiyalarni keng jalb qilish, pullik xizmatlar koʻlamini kengaytirish va boshqa byudjetdan tashqari mablagʻlar hisobiga oliy taʼlim muassasalarida texnopark, forsayt, texnologiyalar transferi, startap, akselerator markazlarini tashkil etish;
• Xalqaro reytingda birinchi 1000 talik ro‘yxatga kiruvchi oliy ta’lim muassasalarida ilmiy daraja (PhD, DSc) olgan professor-o‘qituvchilarni sonini oshirish;
• Xorijda professor-o‘qituvchilar va rahbar kadrlarni malakasini oshirishni yoki stajirovka o‘tashini ta’minlash va h.k.

Bugungi kunda universitet AQSh, Buyuk Britaniya, Germaniya, Ispaniya, Chili, Xitoy, Yaponiya, Janubiy Koreya, Gana, Turkiya, Rossiya, Belarussiya, Qozog‘iston, Qirg‘iziston, Tojikiston davlatlarining 50-tadan ortiq oliy ta’lim muassasalari bilan hamkorlik o‘rnatilgan. Hamkorlik doirasida har yili universitetimizga 20-dan ortiq xorijiy professor-o‘qituvchilar jalb qilinmoqda, 100-lab xorijiy universitetlarga talabalarning akademik mobilligi amalga oshirilmoqda, 11-ta qo‘shma ta’lim dasturlari bo‘yicha kadrlar tayyorlanib kelmoqda, 30 tadan ortiq universitet yosh olimlari va tadqiqotchilari dunyoning turli nufuzli universitetlarga malaka oshirishlari uchun yuborilmoqda. Universitetimiz xodimlari xalqaro loyihalarda faol ishtirok etib kelyaptilar. Bugungi kunga qadar universitetimiz Erasmus plyus, World bank, UniCEN, JSPS, JICA, Royal Society  va boshqa shu kabi tashkilotlar tomonidan moliyalashtiriladigan xalqaro loyihalarni amalga oshirishda chuqur tajribaga ega.

Navoiy davlat konchilik va texnologiyalar universitetida xorijiy abituriyentlar uchun Foundation Course tayyorlov dasturi tashkil etilgan bo‘lib, u rus tilini o‘rganish hamda universitetda o‘qishga moslashishga qaratilgan.

Mazkur kurs bakalavriat bosqichiga kirishni rejalashtirayotgan, ammo rus tili bo‘yicha tayyorgarlikka muhtoj bo‘lgan xorijiy fuqarolar uchun mo‘ljallangan. Bir yil davomida talabalar rus tilini intensiv ravishda o‘rganadilar, o‘qish, yozish, tinglab tushunish va og‘zaki nutq ko‘nikmalarini rivojlantiradilar. Shuningdek, tanlangan mutaxassislik bo‘yicha ta’lim olish uchun zarur bo‘lgan akademik terminologiya bilan tanishadilar.

Dastur talabalarga quyidagi imkoniyatlarni beradi:

• ta’lim olish uchun zarur bo‘lgan rus tilini samarali o‘zlashtirish;

• universitet ta’lim tizimiga moslashish;

• mutaxassislik fanlarini o‘rganishga tayyorgarlik ko‘rish;

• erkin muloqot va akademik yozuv ko‘nikmalarini rivojlantirish.

Xorijiy talabalar uchun bakalavriat ta’limi 1+4 formatida amalga oshiriladi:

• 1 yil — rus tilini o‘rganish bo‘yicha tayyorlov kursi (Foundation Course);

• 4 yil — tanlangan ta’lim yo‘nalishi bo‘yicha bakalavriat ta’limi.

Tayyorlov kursini muvaffaqiyatli tamomlagan talabalar universitetda tanlangan mutaxassislik bo‘yicha o‘qishni davom ettirishlari va o‘quv jarayonida to‘liq ishtirok etishlari mumkin.

Tayyorlov kursi uchun o‘qish narxi: yiliga 600 AQSh dollari.

Mazkur tayyorlov dasturi xorijiy talabalar uchun muvaffaqiyatli ta’lim olish hamda kelajakdagi professional faoliyatlari uchun mustahkam til va akademik asos yaratadi.

Talabalarning ilmiy texnikaviy hamda ijodiy qobiliyatlarini rivojlantirish orqali mutaxassislik va kasbiy ijodiy tayyorgarlik darajasini oshirish maqsadida Navoiy davlat konchilik va texnologiyalar universitetida “Iqtidorli talabalarning ilmiy-tadqiqot faoliyatini tashkil etish” bo‘limi faoliyat yuritmoqda.

Iqtidorli talabalar bilan olib borilayotgan ishlarning asosiy maqsadi Respublikamizning ilmiy va ijodiy salohiyatini rivojlantiruvchi iqtidorli yoshlarni tayyorlash va tegishli fan sohalari bo‘yicha talabalarning bilimini, ijodiy qobiliyati va ijod erkinligini oshirish, shuningdek ularda o‘quv jarayoni va kelajakda amalga oshiradigan amaliy faoliyatida tashabbuskorlik hissini shakllantirish va rivojlantirish, talabalarning ilmiy-tadqiqot faoliyatini amalga oshirish yo‘li bilan o‘z mutaxassisligiga bo‘lgan ijodiy yondashuvini shakllantirish, bo‘lajak mutaxassislarning shaxsiy professional xususiyatlarini shakllantirishga ko‘maklashishdan iboratdir.

Iqtidorli talabalar bilan ishlashni to'g'ri tashkil etish va individual yondashuv tufayli NDKTU talabalari universitetda o'qish davomida katta muvaffaqiyatlarga erishmoqda. Ular muntazam ravishda konferentsiyalar, olimpiadalar va musobaqalarda sovrinli o'rinlarni egallaydilar. Shu maqsadda universitetda qulay sharoitlar yaratilgan. Universitet talabalarining bo‘sh vaqtlarini mazmunli o‘tkazish maqsadida universitetda ilmiy-tadqiqot to‘garaklari, fan to‘garaklari, sport to‘garaklari, ma’naviy-ma’rifiy to‘garaklar faoliyat ko‘rsatib kelmoqda va jami 119 ta to‘garaklarda 2412 nafar talabalar jalb qilingan. Yoshlarni sportga keng jalb qilish va jismoniy tarbiyani ommalashtirish maqsadida universitet sport majmuasida tashkil etilgan. Talabalarga ingliz, nemis, fransuz va rus tillarini mukammal o‘rgatish uchun “O‘zbek va chet tillari” kafedrasida qo‘shimcha tayyorlov kurslari tashkil etilgan. Fan, sport va ma’naviy-ma’rifiy to‘garaklar nafaqat universitetda, shuningdek, talabalar turar joyida ham faoliyat yuritmoqda. Ilmiy-tadqiqot to‘garaklari universitet kafedralarida tashkil qilingan ilmiy-tadqiqot laboratoriyalarida faoliyat olib bormoqda.

Ko‘rilayotgan chora-tadbirlar o‘z samarasini bermoqda. O‘tgan yil davomida talabalar tomonidan 59 ta ilmiy maqola chop etildi, 179 nafar talaba ilmiy-amaliy anjumanlarda qatnashdi.

2023 yildagi yutuqlar qatorida quyidagilarni ta'kidlash lozim:

• O‘zbekiston Respublikasi Oliy va o‘rta maxsus ta’lim vazirligi hamda O‘zbekiston Respublikasi Innovatsion rivojlanish vazirligi tomonidan o‘tkazilgan “Mirzo Ulug‘bek vorislari” tanlovida 1 nafar talaba respublika bosqichida g‘olib bo‘ldi.
• “Ilm-fan sohasidagi ayollar va qizlar xalqaro kuni” munosabati bilan tashkil etilgan “Olima va tadqiqotchi ayollar” ko‘rik tanlovining viloyat bosqichida “Eng yaxshi ilmiy maqola muallifi” nominatsiyasi bo‘yicha1 nafar talaba g‘olib deb topildi.
• 1 nafar talaba “Солнечный свет” xalqaro onlayn olimpiadada ishtirok etib 1-o‘rinni egalladi.
• 1 nafar talaba “O‘zbekiston Respublikasi Prezidenti davlat stipendiya”si sovrindoriga aylangan.
• 3 nafar talaba “Beruniy nomli davlat stipendiya”si sovrindoriga bo‘ldi.
• 1 nafar talaba “Islom Karimov nomli davlat stipendiya”si sovrindori bo‘ldi.
• 1 nafar talaba “O‘zbekiston Respublikasi Prezidenti granti” sovrindori bo‘ldi.