Kamoliddin Behzod Milliy rassomlik va dizayn instituti

Kamoliddin Behzod nomidagi Milliy rassomlik va dizayn instituti 1954-yilda Toshkent shahrida teatr dekoratsiyasi va rangtasvir yo‘nalishi negizida tashkil etilgan. 1997-yilda institut mustaqil oliy ta’lim muassasasi sifatida faoliyat yurita boshlagan.

Bugungi kunda institut O‘zbekistonda tasviriy san’at, amaliy san’at, dizayn, muzeyshunoslik va san’atshunoslik yo‘nalishlari bo‘yicha mutaxassislar tayyorlaydigan yetakchi davlat oliy ta’lim muassasalaridan biri hisoblanadi.

Institut talabalar uchun professional rassom, dizayner, san’atshunos, muzey mutaxassisi va ijodiy soha vakili sifatida shakllanish imkonini beradi. O‘quv jarayoni amaliy mashg‘ulotlar, nazariy bilimlar, ijodiy izlanishlar hamda zamonaviy kasbiy ko‘nikmalar uyg‘unligiga asoslangan.

Talabalarga O‘zbekistonning taniqli rassomlari, dizaynerlari, san’atshunoslari va tajribali professor-o‘qituvchilari ta’lim beradi. Ular yosh ijodkorlarga o‘z iste’dodini rivojlantirish, mustaqil ijodiy fikrlash va zamonaviy mehnat bozorida talab qilinadigan ko‘nikmalarni egallashda yordam beradi.

Institutning Xalqaro hamkorlik bo'limi xorijiy talabalariga viza/ro'yxatdan o'tish uchun hujjatlarni tayyorlashda, kerak bo'lsa, MRDI yotoqxonasiga joylashtirishda yoki yashash uchun boshqa joy topishda yordam beradi.

Ta'lim sohasida xalqaro faoliyatni rivojlantirishdan koʻzlangan umumiy maqsad xalqaro tajribani hisobga olgan holda milliy ta'lim tizimini takomillashtirish va nufuzini koʻtarish, Oʻzbekiston oliy ta'lim muassasalarining xalqaro miqyosda akademik va ilmiy reytinglarni oshirish boʻlib kelmoqda. Institutimiz ham ushbu maqsadda xalqaro faoliyatni rivojlantirishga alohida e'tibor qaratib kelgan va bugungi kunda bir qator, hususan Janubiy Koreya, Belarus, Ozarbayjon, Rossiya Federasiyasi, Yaponiya, Malayziya, Buyuk Britaniya, Ruminiya, Xitoy, Finlyandiya, Belgiya, Qozogʻiston, Polsha, Italiya, Ispaniya, Turkiya, Tailand kabi xorijiy davlatlarning  oliy ta'lim muassasalari bilan professor-oʻqituvchilarning tajriba almashinuvi, talabalar bilan almashinuv, ijodiy koʻrgazmalar, art rezidensiyalar, ilmiy konferensiya va seminarlar, on-layn  videokonferensiyalar oʻtkazish, stajirovka oʻtash va malaka oshirish, birgalikda xalqaro loyihalarni amalga oshirish va shu kabi boshqa yoʻnalishlarda samarali hamkorlik qilib kelmoqda.  Institutimiz tomonidan oxirgi yillarda  Britaniya Kengashining Creative Spark va Change Academy, Erasmus+ CBHE “MUSAE”, UNESCO “Innovation through tradition: scientific practical research in handicrafts of Uzbekistan to develop innovative family business”, Yaponiyaning Samarqand qogʻozi tadqiqotlari loyihasi  kabi loyihalar samarali amalga oshirib kelingan.

Erasmus+ ICM doirasida Ruminiyaning University of Art and Design in Cluj-Napoca va Ispaniyaning  Escuela superior de diseno region de Murcia oliygohlarida institut talabalari bir semestrga moʻljallangan talaba mobilligida qatnashib kelmoqdalar.

Institutda 2 ta Tailandning Chanapatana xalqaro dizayn instituti va Janubiy Koreyaning Kemyong universiteti bilan qoʻshma dasturlar tuzilgan. Qirgʻiziston Respublikasi, Rossiya federasiyasi , Qozogʻiston Respublikasi, Janubiy Koreya va Ukrainadan 8 ta bakalavr yoʻnalishi talabalari tahsil olmoqda.

Professor-oʻqituvchilar Al-Farobiy nomidagi Qozogʻiston Milliy universiteti, Qozogʻiston Respublikasi Muxtor Auezov nomidagi  Janubiy-Qozogʻiston Universiteti, Malayziyaning Pendidikan Sulton Idris universiteti, Koreyaning Kemyong universiteti, Turkiyaning Karabuk universiteti, Kyutaxya Dumlupinar universitetilariga taklif etilib, ma'ruza va seminar, mahorat darslarini oʻtib kelmoqdalar. Oʻz oʻrnida institutning oʻquv va ilmiy faoliyatiga Malayziya, Ispaniya, Polsha, Janubiy Koreya, Yaponiya, AQShning ilgʻor universitet professorlari jalb etilmoqda.

Davlatimizda faoliyat yuritayotgan xorijiy davlatlarning elchixonalari, tashkilotlari hamda doʻstlik jamiyatlari bilan ta'lim, ilm-fan va san'at yoʻnalishlarida ham yaqindan hamkorlik aloqalari oʻrnatilgan. Buni yaqqol misoli, UNESCO, KOICA, JICA, Britaniya Kengashi,  Erasmus+ milliy ofisi va boshqa tashkilotlarni keltirishimiz mumkin.

 Institutida ingliz tili kurslari mavjud. Ushbu kurslar o'quvchilarga ingliz tilini o'zlashtirish, og'zaki va yozma ko'nikmalarini rivojlantirish hamda xalqaro til sertifikatlash imtihonlariga tayyorgarlik ko'rishga yordam berish uchun mo'ljallangan. Darslar malakali mutaxassislar tomonidan zamonaviy o'qitish usullaridan foydalangan holda olib boriladi. Grammatika, tinglab tushunish, o'qish, yozish va muloqot ko'nikmalariga alohida e'tibor beriladi. Talabalar, professor-o'qituvchilar, institut xodimlari va ingliz tilini o'rganishga qiziqqan har bir kishi ishtirok etishi mumkin. Kurslar xorijiy tillarni o'rganish va xalqaro ta'lim va tadqiqot loyihalarida faol ishtirok etish uchun ajoyib imkoniyatlar yaratadi.

MRDIda oʻqishni xohlovchi chet el fuqarolari tanlagan taʼlim yoʻnalishi boʻyicha qabul komissiyasi bilan suhbatdan oʻtadilar. Suhbat avgust oyining birinchi yoki ikkinchi o‘n kunligida rus yoki o‘zbek tillarida bo‘lib o‘tadi