Stomatologiya

Stomatologiya yo‘nalishi inson salomatligini saqlash va yaxshilashga xizmat qiluvchi eng muhim tibbiyot yo‘nalishlaridan biri hisoblanadi. Ushbu ta'lim dasturi talabalarga og‘iz bo‘shlig‘i, tishlar, jag‘ tizimi va ularga bog‘liq kasalliklarni tashxislash, davolash hamda oldini olish bo‘yicha zamonaviy nazariy bilim va amaliy ko‘nikmalarni egallash imkonini beradi.

Ta'lim jarayonida talabalar fundamental tibbiy fanlar bilan bir qatorda terapevtik, ortopedik, jarrohlik, bolalar stomatologiyasi, ortodontiya, parodontologiya, implantologiya, rentgenologiya va boshqa ixtisoslashtirilgan fanlarni chuqur o‘rganadilar. O‘quv dasturi xalqaro ta'lim standartlari asosida ishlab chiqilgan bo‘lib, zamonaviy pedagogik texnologiyalar, raqamli ta'lim platformalari, simulyatsion markazlar va innovatsion laboratoriyalardan keng foydalaniladi.

Talabalar nazariy bilimlarni universitetning zamonaviy klinikalari, simulyatsion laboratoriyalari hamda hamkor tibbiyot muassasalarida amaliyot o‘tash orqali mustahkamlaydilar. O‘quv jarayonida bemorlar bilan ishlash madaniyati, kasbiy etikaga rioya qilish, klinik fikrlash va mustaqil qaror qabul qilish ko‘nikmalariga alohida e'tibor qaratiladi.