Kompyuter lingvistikasi

Kompyuter lingvistikasi bakalavriat ta’lim yo‘nalishi tabiiy tillarni kompyuter texnologiyalari yordamida tahlil qilish, qayta ishlash va sun’iy intellekt tizimlarida qo‘llash bo‘yicha zamonaviy bilim va amaliy ko‘nikmalarga ega mutaxassislarni tayyorlashga yo‘naltirilgan. Ta’lim jarayonida umumiy va amaliy tilshunoslik, matematik lingvistika, tabiiy tilni qayta ishlash (NLP), sun’iy intellekt asoslari, dasturlash, ma’lumotlar bazalari, mashinaviy tarjima, korpus lingvistikasi, nutq texnologiyalari hamda kompyuter modellashtirish fanlari o‘qitiladi. Talabalar lingvistik ma’lumotlarni tahlil qilish, raqamli lug‘atlar va til korpuslarini yaratish, matnlarni avtomatik qayta ishlash, ovozni tanish va sintez qilish, chatbotlar hamda boshqa til texnologiyalarini ishlab chiqish ko‘nikmalarini egallaydilar. Bitiruvchilar axborot texnologiyalari kompaniyalari, ilmiy-tadqiqot markazlari, ta’lim muassasalari, tarjima markazlari, sun’iy intellekt va til texnologiyalari yo‘nalishida faoliyat yurituvchi tashkilotlarda ishlashlari mumkin.