Chirchiq davlat pedagogika universiteti

Fakultet bugungi kunda zamonaviy ta’lim talablari asosida yuqori malakali pedagogik va ilmiy kadrlar tayyorlashga ixtisoslashgan. Fakultet tarkibida quyidagi kafedralar faoliyat yuritadi: Informatika va axborot texnologiyalari, Informatika o‘qitish metodikasi, Matematika o‘qitish metodikasi va geometriya, Algebra va matematik analiz. Ushbu kafedralar negizida 5110100 – Matematika o‘qitish metodikasi, 5110700 – Informatika o‘qitish metodikasi, 60110600 – Matematika va informatika bakalavriat yo‘nalishlari hamda 70110601 – Aniq va tabiiy fanlarni o‘qitish metodikasi (matematika) magistratura mutaxassisligi bo‘yicha kadrlar tayyorlanmoqda. Shuningdek, fakultetda fizika va astronomiya yo‘nalishlari bo‘yicha ham ta’lim jarayoni yo‘lga qo‘yilgan bo‘lib, talabalarga zamonaviy axborot texnologiyalaridan foydalangan holda chuqur nazariy va amaliy bilimlar beriladi. Fakultetda Fizika va astronomiya, Fizika va astronomiya o‘qitish metodikasi, Aniq fanlarni o‘qitish metodikasi (fizika va astronomiya) magistratura mutaxassisliklari mavjud. Bundan tashqari, fakultetda PhD doktorantura yo‘nalishi orqali ilmiy-pedagogik kadrlar tayyorlash amalga oshiriladi.

Turizm fakulteti tashkil etilguniga qadar fakultet tarkibidagi Xorijiy til va adabiyoti (ingliz tili), Xorijiy til va adabiyoti (nemis tili) bakalavriat ta’lim yo‘nalishlari hamda Ingliz tili va adabiyoti magistratura mutaxassisligi 2017-yilda tashkil etilgan “Tarix va tillar” fakulteti tarkibida faoliyat yuritgan. Ma’lumki, 2020-yilda mazkur fakultet “Gumanitar fanlar” fakulteti deb qayta nomlangan.

O‘zbekiston Respublikasi Vazirlar Mahkamasining 2021-yil 14-apreldagi **“Toshkent viloyati Chirchiq davlat pedagogika instituti faoliyatini yanada takomillashtirish chora-tadbirlari to‘g‘risida”**gi qarorining 9-bandiga muvofiq hamda 2021-yil 23-avgustdagi Institut Kengashining 1-sonli yig‘ilishi qarori asosida Turizm fakulteti tashkil etildi.

Yangi tashkil etilgan fakultet tarkibiga Gumanitar fanlar fakultetidan “Xorijiy tillar”, “Fakultetlararo chet tillar” kafedralari, shuningdek, Kengash qarori bilan tashkil etilgan “Umumkasbiy va ixtisoslik fanlari” kafedrasi o‘tkazildi. Bugungi kunda Turizm fakulteti zamonaviy ta’lim talablari asosida turizm, xorijiy tillar va kasbiy yo‘nalishlar bo‘yicha raqobatbardosh, malakali kadrlar tayyorlashga ixtisoslashgan holda faoliyat yuritmoqda.

Gumanitar fanlar fakulteti 2017-yilda “Tarix va tillar” fakulteti sifatida tashkil etilgan. Chirchiq davlat pedagogika instituti (hozirgi universitet) Kengashining 2020-yil 31-oktabrdagi 4-sonli yig‘ilishi qaroriga muvofiq, fakultet Gumanitar fanlar fakulteti deb qayta nomlangan.

Bugungi kunda fakultetda jami 3311 nafar talaba zamonaviy jihozlangan auditoriya va laboratoriyalarda turli ta’lim dasturlari bo‘yicha tahsil olmoqda. Jumladan, 1517 nafar talaba kunduzgi bakalavriatda, 167 nafar talaba kunduzgi magistraturada, 17 nafar talaba kechki magistraturada, 1407 nafar talaba sirtqi (2-OT) ta’limda hamda 203 nafar talaba kechki ta’limda o‘qimoqda.

Fakultetda jami 117 nafar professor-o‘qituvchi faoliyat yuritadi, shundan 9 nafari fan doktori (professor), 38 nafari fan nomzodi (dotsent)dir. Ta’lim jarayoni ijtimoiy-gumanitar yo‘nalishlar (tarix, milliy g‘oya, huquq ta’limi) hamda filologiya yo‘nalishlari (o‘zbek tili va adabiyoti, rus tili va adabiyoti, o‘zga tilli guruhlarda rus tili, qozoq tili, tojik tili) bo‘yicha bakalavriat, magistratura va doktorantura bosqichlarida olib boriladi. Talabalar kunduzgi, sirtqi, kechki va magistratura shakllarida ta’lim oladilar.

Shuningdek, fakultetda til sertifikatiga ega yosh o‘qituvchilar tomonidan ayrim fanlarning ingliz tilida o‘qitilishi yo‘lga qo‘yilgan, o‘quv jarayonida zamonaviy elektron dastur va resurslardan foydalaniladi.

Bakalavriat ta’lim yo‘nalishlari:

• 60111100 — Milliy g‘oya, ma’naviyat asoslari va huquq ta’limi

• 60220300 — Tarix

• 60110700 — O‘zbek tili va adabiyoti

• 60110800 — Ona tili va adabiyoti (qozoq tili)

• 60110800 — Ona tili va adabiyoti (tojik tili)

• 60110800 — Ona tili va adabiyoti (rus tili)

Magistratura mutaxassisliklari:

• 70110101 — O‘zbek tili va adabiyoti

• 70110801 — Ona tili va adabiyoti (rus tili)

• 70110801 — Ona tili va adabiyoti (qozoq tili)

• 7011101 — Ijtimoiy-gumanitar fanlarni o‘qitish metodikasi (ma’naviyat asoslari)

• 7011102 — Ijtimoiy-gumanitar fanlarni o‘qitish metodikasi (huquq ta’limi)

• 70220303 — Ijtimoiy-gumanitar fanlarni o‘qitish metodikasi (tarix)

MAKTABGACHA VA BOSHLANG‘ICH TA’LIM FAKULTETI

Toshkent viloyati Chirchiq davlat pedagogika universitetining Maktabgacha va boshlang‘ich ta’lim fakulteti 2021-yil 23-avgustdan boshlab o‘quv-uslubiy, ilmiy hamda ma’naviy-ma’rifiy jarayonlarda mustaqil faoliyat yuritib kelmoqda. Fakultet universitet tuzilmasida muhim o‘rin tutib, ta’lim sifatini oshirish hamda raqobatbardosh pedagog kadrlar tayyorlashga ixtisoslashgan.

Hozirgi kunda fakultetda 1444 nafar kunduzgi, 126 nafar kechki, 160 nafar ikkinchi oliy ta’lim hamda 1820 nafar sirtqi bo‘lim talabalari tahsil olmoqda. Ta’lim jarayoni zamonaviy pedagogik texnologiyalar asosida tashkil etilib, nazariya va amaliyot uyg‘unligiga alohida e’tibor qaratiladi.

Fakultet kasbiy yo‘nalishlar bo‘yicha mutaxassislar tayyorlaydi. O‘qish muddati kunduzgi bo‘limda 3 yil (6 semestr), sirtqi bo‘limda esa 5 yilni tashkil etadi. Sirtqi ta’lim uchun ishlab chiqilgan o‘quv dasturlar o‘qish va mehnat faoliyatini birgalikda olib borish imkonini beradi. Fakultetning asosiy akademik maqsadi — maktabgacha ta’lim muassasalari hamda boshlang‘ich ta’lim tizimi uchun malakali, zamonaviy bilim va ko‘nikmalarga ega pedagog kadrlar tayyorlashdan iborat.

Pedagogika fakulteti 2019-yilda tashkil etilgan. Fakultetning strategik missiyasi — ilg‘or xorijiy va mahalliy tajribalar asosida integratsion hamda intensiv ta’lim dasturlarini joriy etish, pedagogik ta’lim amaliyotiga yangi yondashuvlarni (aralash ta’lim, inklyuziv ta’lim, integratsiyalashgan ta’lim) tatbiq etish va raqamlashtirish texnologiyalarini uyg‘unlashtirish orqali fakultetning zamonaviy imidjini shakllantirish, shuningdek, ta’lim klasteri muhitida uzluksiz ta’lim samaradorligining pedagogik-psixologik asoslarini yaratishdan iborat.

Fakultetning strategik maqsadi — pedagogik ta’limning innovatsion klasteri doirasida pedagogik-psixologik asoslarni chuqur tadqiq etish, modernizatsiyalashgan o‘quv fanlari hamda innovatsion ta’lim amaliyoti yutuqlariga mos metodikalarni ishlab chiqish asosida kompleks kompetensiyalarga ega, raqobatbardosh pedagog kadrlar tayyorlashdir.

Pedagogika fakultetining istiqbolli rivojlanish konsepsiyasi — ta’lim klasteri sharoitida ilmiy-metodik muhit samaradorligini ta’minlash bo‘lib, u quyidagi 7 asosiy komponentni qamrab oladi: maktab laboratoriyasi, inklyuziv ta’lim, talabalar bandligi, aralash ta’lim, jozibadorlik, akademik mobillik va ilmiy-tadqiqot klasteri. Fakultet mazkur yo‘nalishlar asosida ta’limdagi yangi yondashuvlarga tayangan holda rivojlanayotgan, zamonaviy va raqobatbardosh oliy ta’lim muassasasi sifatida shakllanishni maqsad qilgan.

Pedagogika fakultetining shiori:
“Pedagogik ta’lim paradigmalari asosida ilmiy-metodik muhit samaradorligini ta’minlash nazariyasi va amaliyotini transformatsiyalash.”

Chirchiq davlat pedagogika instituti (hozirgi universitet) qoshidagi Tabiiy fanlar fakulteti dastlab 2017-yilda “Aniq va tabiiy fanlar” fakulteti nomi bilan tashkil etilgan. Fakultet faoliyatini mustaqil yo‘lga qo‘yish borasidagi muhim hujjat 2019-yil 31-avgustda qabul qilinib, institut rektorining 2019-yil 31-avgustdagi №01-642 sonli buyrug‘iga muvofiq Tabiiy fanlar fakulteti “Aniq va tabiiy fanlar” fakultetidan alohida, mustaqil fakultet sifatida ajralib chiqdi.

Bugungi kunda fakultetda 1328 nafar talaba zamonaviy jihozlangan auditoriya va laboratoriyalarda turli ta’lim dasturlari bo‘yicha tahsil olmoqda. Jumladan, 694 nafar talaba kunduzgi bakalavriatda, 29 nafar talaba kunduzgi magistraturada, 407 nafar talaba sirtqi va ikkinchi oliy ta’limda hamda 198 nafar talaba kechki ta’limda o‘qimoqda.

Fakultetda jami 49 nafar professor-o‘qituvchi faoliyat yuritadi, shundan 8 nafari fan doktori, professor, 20 nafari falsafa doktori (PhD/fan nomzodi) va 21 nafari tajribali professor-o‘qituvchilardir. Ta’lim jarayoni bakalavriat, magistratura va doktorantura bosqichlarida olib boriladi.

Bakalavriat yo‘nalishlari:

• Kunduzgi ta’lim: Biologiya; Geografiya; Geografiya va iqtisodiy bilim asoslari

• Sirtqi ta’lim: Biologiya

• Kechki ta’lim: Biologiya; Geografiya; Geografiya va iqtisodiy bilim asoslari

Magistratura mutaxassisliklari:

• Aniq va tabiiy fanlarni o‘qitish metodikasi (biologiya)

• Aniq va tabiiy fanlarni o‘qitish metodikasi (geografiya)

Doktorantura yo‘nalishlari:

• O‘simliklar fiziologiyasi va biokimyosi

• Mikrobiologiya va virusologiya

• Iqtisodiy va ijtimoiy geografiya

Jismoniy madaniyat fakulteti dastlab 2019-yil 27-avgustda institut kengaytirilgan kengashining 1-son qaroriga muvofiq Sport va chaqiriqqacha harbiy fakulteti sifatida tashkil etilgan. Keyinchalik, 2023-yil 27-oktabrdagi 01-242-son buyrug‘iga asosan u rasman Jismoniy madaniyat fakulteti deb qayta nomlandi. Fakultet Toshkent viloyati, Chirchiq shahri, Bobur ko‘chasi 22-uy manzilida, Chirchiq davlat pedagogika universitetining 5-binosida joylashgan.

Bugungi kunda fakultetda 2276 nafar talaba turli ta’lim shakllarida tahsil olmoqda: 743 nafar kunduzgi, 13 nafar magistratura, 1432 nafar sirtqi (2-OT) hamda 88 nafar kechki ta’limda.

Fakultetda 40 nafar professor-o‘qituvchi faoliyat yuritadi, jumladan 1 nafar fan doktori, professor va 12 nafar fan nomzodi, dotsentlar mavjud. Fakultet bakalavriat va magistratura bosqichlarida kadrlar tayyorlaydi.

Ta’lim yo‘nalishlari:

• Jismoniy madaniyat (jismoniy madaniyat va xotin-qizlar sporti)

• Texnologik ta’lim

Chirchiq davlat pedagogika universitetining San’atshunoslik fakulteti 2021-yildan buyon faoliyat yuritib kelmoqda. Fakultetning asosiy maqsadi — tasviriy san’at, dizayn, muhandislik va kompyuter grafikasi hamda musiqa ta’limi yo‘nalishlarida bozor iqtisodiyoti va zamon talablariga mos, kreativ fikrlaydigan, xalqaro miqyosda raqobatbardosh ijodkor pedagog kadrlar tayyorlashdir.

Fakultet bakalavriat va magistratura bosqichlarida quyidagi ta’lim dasturlarini taklif etadi.

Bakalavriat dasturlari:

• 60110500 – Tasviriy san’at va muhandislik grafikasi: Badiiy ko‘nikmalarni texnik chizmachilik va grafik tasvirlash bilan uyg‘unlashtiradi.

• 60210400 – Dizayn: interyer dizayni: Makonni rejalashtirish, material tanlash va dizayn tamoyillariga yo‘naltirilgan.

• 60210400 – Dizayn: libos va gazlamalar: Kiyim-kechak va to‘qimachilik mahsulotlarini loyihalash va yaratishga ixtisoslashgan.

• 60110600 – Musiqa ta’limi: Bo‘lajak musiqa o‘qituvchilarini tayyorlashga qaratilgan.

Magistratura dasturlari:

• 70110501 – Tasviriy san’at: Badiiy amaliyot, nazariya va tanqidiy tahlil bo‘yicha chuqurlashtirilgan tayyorlov.

• 701110502 – Muhandislik grafikasi va dizayn nazariyasi: Texnik illustratsiya, grafik kommunikatsiya va dizayn nazariyasining ilg‘or yo‘nalishlari.