Sinszyan Fanlar akademiyasi a’zosi universitetga tashrif buyurdi

Sinszyan Fanlar akademiyasi a’zosi, xitoylik olim Qiao Berdaq nomidagi Qoraqalpoq davlat universitetida bo‘ldi. Dastlab mehmonni universitet faoliyati, ilmiy-tadqiqot yo‘nalishlari hamda ekologiya va atrof-muhitni muhofaza qilish sohasida amalga oshirilayotgan ilmiy ishlar bilan tanishtirildi. Shundan so‘ng, mehmon universitet rektori B.Jollibekov bilan uchrashib, o‘zaro suhbatlashdi. Uchrashuv davomida hududda ekologik barqarorlikni ta’minlash, bioxilma-xillikni saqlash va atrof-muhitni muhofaza qilishga qaratilgan ilmiy tadqiqotlar yuzasidan fikr almashildi. Suhbat chog‘ida ikki muassasa o‘rtasida ilmiy va akademik hamkorlikni rivojlantirish masalalari ham muhokama qilindi. Xususan, kelgusida ekologiya va bioxilma-xillikni saqlash borasida qo‘shma ilmiy loyihalarni amalga oshirish, ilmiy tadqiqotlar olib borish, seminar va konferensiyalar tashkil etish, shuningdek, mutaxassislar o‘rtasida tajriba almashishni yo‘lga qo‘yish bo‘yicha takliflar bildirildi.